النصائح العشرة لي كا ينصحو بيها الأغنياء وليداتهوم
.png)
( و كاين البعض - من دون تعميم - ) لي كا يوصيهوم باش ما يبارتاجيهومش مع وليدات الفقراء باش يبقاو ديما خدامين يد عاملة عند الطبقة الغنية )
واش ما كا تلاحضش معايا أن أسر فقيرة و على قد الحال؟ كا تلقاها ما عمرها تزيرات لدرجة أنها تسلف، لدرجة أنك بكترة ما ما كايتشكاوش ليك و يبكيو ليك على حالهوم
كايدخلك الشك : واش هادو بصح فقراء ؟ " يحسبهم الجاهلُ أغنياء من التعفف "
عكس بعض الأسر المتوسطة لي كا تشوفهوم من برا كا يبانو ليك أغنياء، و لكن إذا شفتيهوم من الداخل غا تلقاهوم عايشين بالكريديات.
و شي مرات كا تلقا واحد خدام بصالير 3000 درهم للشهر ما عمرو تزير باش يمد يديه للناس أو البانكا يتسلف، متحكم مزيان فالنفقات ديالو، و ربما تلقا هداك لي كا يشد 8000 درهم شهريا كا يتسلف عند مول 3000 درهم !!!
وايلي كي دار ليها!
هنا إذا جيتي تأمل مزيان و تحلل هاد المسألة غادي تفهم أن السر ماشي فالصالير، و لكن السر كاين ف '' التدبير''، فهاد المقال غادي نتقاسم معاك نصائح تطبيقية لحُسن تدبير المال عن طريق التوفير و الإستثمار. خاصة و أنهُ فصغرنا رباونا على أننا نفقو الفلوس و نوفرو الشياطة، و لكن التربية المالية لي ما قراوناش هي :
1- الأغنياء ملي كا يشدو شي خلصة كا يوفرو أولا، باش يستثمرو ثانيا، ثم ينفقو داكشي لي بقا، عكس الفقراء لي كا يزلعو الفلوس، عاد كا يوفرو الشياطة فقليليشة ديال الطين لي سرعان ما كا يهرسوها ملي كا يبغيو يسافرو فالصيف.
2- توفير الفلوس ماشي هو تجمع الجوجدريالات و الربعادريالات و العشراوات و الدراهم، و لكن التوفير الحقيقي هو إذا كان صاليرك 5000 درهم مثلا، كا تشد 20% لي هي 1000 درهم، و كا توفرها ماشي باش تزلعها من بعد، لأن التوفير ما عندو حتى معنى إذا كنت غادي نخشي الفلوس تحت الزليجة و نتسنا حتى يدوز عام و نوض نزربقها، و لكن التوفير عندو غاية وحدة لي هي الإستثمار، كيفاش الإستثمار و بلا لغة الخشب ؟
3- ديك ال 1000 درهم لي وفرت كا نتسنى الشهر لي من موراه و كا تولي عندي 2000 درهم و لي هي رأس مال كافي نقدر نشري بيه سلعة لي البيع ديالها مضمون، مثلا : نشري ملابس و نعاود فيهوم البيع، هنا كا نخلي الفلوس ديالي يكبرو، لأنهُ إذا ما كبروش غادي يصغارو بسباب التضخم ( نقصان قيمة المال ) والتضخم هو : ال 100 درهم لي كانت قادرة تجيب ليك التقضية ديال السيمانة العام لي فات، ولات دابا كا تجيب ليك نصها، بمعنى أن القيمة ديالها طاحت ب 50% .
4- قاوم شهوة الشراء و الإستهلاك، و هنا خود هاد القاعدة ديال : ما نشري الحاجة حتى يكون عندي باش نشري 10 منها.
مثلا بغيت نشري أيفون ب 10000 درهم، حتى تكُون عندي 010000 درهم فالكونط عاد نشريه و جات معايا. و ديما أحسن حاجة هي يكون عندك تيليفون ديال ألف درهم، و 10 آلاف درهم فالكونط، حسن ما يكون عندك تيليفون ديال 10 آلاف درهم و ألف درهم فالكونط ( وهذا مثال يمكن ليك تطبقو على كولشي ).
5- نوع مصادر الدخل، و ما تعولش على بزنس وحدة، فين ما بان ليك شي فرصة تخلي فلوسك يكبرو ما تزكلهاش، مثلا نتا كا تبيع الخدمات ديالك فالأنترنت، ما تعولش غير على الأنترنت بوحدو، تقدر من فلوس الأنترنت تبدا شي بيعة وشرية و تكلف شي واحد يقابلها ليك، و هنا غا تقُول ليا : ماكاينش معامن و فين الناس الثقة ؟ هنا غا نجاوبك فالنصيحة 6 .
6- ركز على العلاقات مع الرجال، و ما تسميهوم رجال حتى تعامل معاهوم بأغراس أغراس، الفلوس هوما لي كا يخليوك تعرف حقيقة بنادم، لي سلفتيه 200 درهم و ما ردهاش ليك، كيفاش بغيتي تأتامنو على سلعة ديال 2000 درهم ؟ هنا حل عينيك مزيان، فين ما يبان ليك شي واحد معقول، قوي علاقتك معاه، و تيستيه بقدر قليل من الفلوس، إذا نجح فالإختبار، تقدر تدخلو معاك شريك فالربح، أو تفوض ليه التجارة و تقسم الربح معاه.
7- كوْن راسك فمهارات البيع و التسويق و التفاوض و الإقناع و تعمق فقوانين الطبيعة البشرية، عن طريق قراءة الكُتب، و الدورات المفيدة، لأن هاد المهارات غا يضاعفو الأرباح ديالك بوتيرة أكبر من لي كا توقع.
8- شارجي دماغك بكتب الثقافة المالية ، لي كا تنور ليك العقلية ديالك و كا تحررك من العقلية الفقيرة .
9- تبع المصروف ديالك بالورقة و الستيلو، لأنهُ :" ما لا يمكن تدبيره ، لا يمكن مراقبته "
10- الثروة ديالك ما تحسبهاش بالفلوس، و لكن حسبها بالوقت، كيفاش ؟
لنفرض مثلا كا تنفق 100 درهم كل نهار، و نتا عندك فالكونط عشرالاف درهم، هنا الثروة ديالك كا تساوي : 100 يوم، بمعنى أنهُ عندك 100 يوم عندك الحق فيها ما تخدمش، و حتى إذا خدمتي ما تكونش خدمتك بهدف الفلوس. باختصار : الثروة ديالك هي شحال قادر تعيش بلا ما تحتاج تخدم على ود الفلوس. هنا نصيحة عملية : حاول تجمع واحد القدر من الفلوس لي يضمن ليك أنك تعيش : عام كامل بلا ما تكون مضطر تخدم.
مثلا إذا كنتي كا تخسر 100 درهم فالنهار، 30000 درهم كافياك لعام كامل، هنا غا تقول ليا شنو غا ندير ؟ بهاد الطريقة غادي تكُون سثمرتي فراسك، بمعنى أنك حررتي راسك من التفكير فالفلوس، هنا تقدر تركز فالعام كامل على أنك تمضي المنشار ديالك باش يقطع ليك الشجر بسهولة و بسرعة، كيفاش ؟
هاد العام تقدر تخصصو لأنك تصقل المهارة ديالك فمجال معين لي من بعد غا يولي يصب عليك الفلوس بحال الشتا، المنفعة ديالك أنك توفر عام ديال الفلوس، هو أن دماغك كا يكون حر و مركز 100% و متحرر من المشتتات المالية ، ها مول الكرا غا يدق عليا، ها الما ها الضو ها الويفي ها المصاريف ها قهوة، داكشي كولو وفرتيه و تنييتي منو، دماغك كا يولي مكونسونطري ميا فالميا على #الأصول ، و لي هي المهارات و العلاقات ديالك.
الخلاصة : أهم سبب يحفزك تربي راسك ماليا و دير الفلوس هو :
باش ما تبقاش تفكر فالفلوس إيوا أمولاي و فاش نفكر إذن ؟
غا تولي تفكر فما هو أهم من الفلوس : العائلة و صحتهوم و صحتك و علاقاتك و عقليتك و نفسيتك و روحك لي هوما علاش داير الفيلم كامل.
و خلاها براين تريسي :
” جمع المال وكسبه هو مثل الحفر بواسطة مسمار، أما إنفاق المال فهو بمثابة صب الماء فوق الرمال الناعمة“.
ودمتم سالمين